اللهجه الحجازيه وه بس ياناسواا

....تاريخ اللهجه الحجازيه ....


هي لهجة أهل المنطقة الغربية في السعودية وتتمركز بالذات في مكه وجده والمدينة والمدن القريبة منها اكثر من باقي المدن اللي في الغربية وهي لهجة تأخذ من اللهجة البدوية و اللهجة المصرية ولكنها تميل الى المصرية والسبب انه ايام العثمانيين كان فيها مصارية كتير قد الجبل

وطبعا تختلف لهجة العجايز عن الجيل الحاضر ..

لهجة العجايز تحسوها معتقة ومصطلحاتها القديمة ما تنفهم وما يستخدموها الا عتقية البلد اما الشباب حقون دحين ما عاد صار يستخدموها . وكمان ما ننسى ان اللهجة الحجازية فيها الكثير من الأمثال القيمة




....مصطلحات حجازية ....
في كثير من المصطلحات الحجازية اللي من الصعب انو اي واحد غير حجازي يفهمها واتفضلوا هذي بعضها:
ما لي دعوة ... اللي ما يفهم و لا اللي يقرأ غلط .......أخلي مسؤوليتي

قوام = بسرعة

حُقْ =علبه

بلكن = يمكن

أقيس = أظن

دحين= الآن ..

الديقيسي = غرفة في السطح (وفي روايه اخرى) الفراغ اللي تحت الدرج أو المخزن

مصرفد = مستعجل

دولا أو دُولْ =هؤلاء أو هم

أمزع رقبتك=سبه أمي تقولنا هيا

داير مدار أو داير مايدور = حولين الشيء

دغري = على طول

امصع أدنك=يعني أجرها

مخمج = معفن

جغمه = تقريبا شفطه أو رشفه من الشراب

وي=للتعجب

الدحديرة = النزلة

ناولني = أعطيني

ازهملي= نادي لي

زنبيل = الكيس

منضره = نظاره

يواد=ياولد

الصمرقع = الجنان

وخرلو = ابتعد عنه

اشبك=ماذا بك

سكر المحل = قفل

بسط المحل = فتح

سيبوا=اتركه

أندر = اخرج

أفرشك فرش=أضربك ضرب

حزر فزر = يعني توقع

محزقر= ضيق

قُصرو = اختصار الشيء

دحلسة= تملق وتقرب لأخذ شئ ما

ايشكلو = إيش هوا

عبال = إلى أن

بطران = ما يحمد ربه

زهمني = ناداني

مقرحف = ناشف زي لما تقول العيش زي وجهك مقرحف

اتشعبط = أتسلق

متاقه = أخت مجاغه= واحد دمه ثقيل

اتاري = لها معنيين الأول كمبيوتروالتاني لما يقولك آآآآآه اتاري الهرجه كداااااا

بحلقت=فتحت عيني بقوة

قِر=اهجد

فارقي=انقلعي_ روحي

كدش = الشعر الكثيف المخربط

مخدة=وساده

أقيد الرقم = اسجله

ما بلعتو من زور = ما عجبني

اهبدك الين أجدد إيمانك = تهديد عنيف




....أمثال حجازية ....

إذا جيت رايح كتر من الفضايح.

بعد ما أكل واتكا قال ريحته مستكا .

حاجه ما تهمك وصي عليها جوز أمك.

ست وجاريتين على قلي بيضتين.

أعمى ويلضم خرز.

دلع الكبار زي الشقدف على الحمار.

اللي ماله أم حاله يغم.

كنس بيتك ورشُو ما تدري مين يخشو.

كل حبه مسوسه لها كيال أعور.

على قد زيتوا سرجلوا.

الخايبه تتعلق بالحبال الدايبه.

عقربه في الغار ولا ضره في الدار.

خاتم بفصو وكل شي ترصوا.

أهري وانكتي يا جاره وأنا ثابته زي العماره.




....القاب حجازية ....
عندنا في الحجاز وخصوصا مكه في اسماء يعطوها كنيه او لقب ... وهذي بعضها :

عبدالرحمن : الوجيه ...<<<ياناااااااااااسوو عليه
عمر : أبوسراج
حسين : أبو هلال
عبدالله : عبادي او ابو عابد
عبد الرحيم : أبو رحمه
فيصل : أبو عبدالله
عبد العزيز : عزيز أو ابوسعود
فاطمة : فتو
مريم : منّة
ابراهيم : أبو خليل

وفي غيرها كتييير... بس دي اللي عندي

لبى لهجتي ولهجه اهلي